Di sada tingki adongma
parsalisian di tano Tambun, ima sada pomparan ni Samosir Ruma Sidari Tumpak
Bolon maradophon marga Gultom sian Siriaon hinorhonni utang naso targarar.
Ditahi rohani Gultom ma naeng manutung huta Tambun Tonga-tonga (Ingananni Tugu
saonari). Di na sahat hata i tu opputta na di Tambun Tonga-tonga marbulusnirohama
nasida na laho manutung hutana sandiri daripada
ditutung Gultom. Dipapungu nasida ma durame dohot sampilpil humaliang jabu na
adong di Tambun Tonga-tonga. Asa molo ro Gultom naeng mamorang nasida laos
tutungonna ma huta i.
Uju papungu durame i par Tambun
Tonga-tonga, mamolus ma sada natua-tua parhapistaran namargoar Guru Mandailing.
Disukkunma aha do na masa di huta i. Dung dipaboa oppu ta tu Guru Mandailing,
gabe didok Guru Mandailing ma tu omputa, “Buat ma jolo sada manuk mira asa
huida songon dia nanaeng masa adopanmu di parporangan mu on!”
Dung dibuat oppu ta sada manuk
mira sialtong, dungi marmanuk diampang manasida manukkun tumulajadi,
dipasahatma tu Guru Mandailing, gabe didok ma songon on, “Ia hata-hata ni manuk
mu on, ondo; ia goar ni manuk mu on ima manuk si Jarangjangjoang,
lapatan gabe hauma dang binaboan sae utang dang binahonan, jala pandohanna
monang do ho diparporangan mu on. Alai on do, dung monang ho diparporanganmu on,
ingkon patupaonmuna do partangiangan jala mangallang horbo gok do hamu saoppu
jala pasangap hula-hulamu asa gok hamoraon, gok hagabeon, gok hasangapon, jala
gok hapistaron di hamu, nang pinomparmuna!”
On ma sada ulpuhan na masa uju i
jala manjadi do songon nanidokni Guru Mandailing i, ima namonang do oppu ta di parporanganna
maralohon Gultom. Alai nang pe naung monang na sida di parporangan i, ndang boi
dope sada roha nasida di bona pasogit patupahon partangiangan na mangallang
horbo gok i, sahat rodi taon 1990-an nang pe ganup taon i ditaringoti sian
sundut tu sundut pomparanni oppu ta.
Di sada tingki ro ma sahalak
natua-tua (na so tarboto manangna ise
goarna dohot sian dia haroroanna) mandapothon Ama Gelmok Samosir (Op.
Tiffanny) na laho pasahathon tona ni Oppu ta si Bursok Bolon (goar
sihaetehetehonni Oppu ta Tumpak Bolon), na mandok, “Papunguma pomparanni si
Bursok Bolon (Tumpak Bolon) asa patupa hamu na mangallang horbo gok!” Jadi
dialusi Ama Gelmok ma, “Ndang tarpapungu ahu i” Dung i didok natua-tua i ma tu
Ama Gelmok, “Papunguma hudongani pe ho, i do didok oppu muna i. Ndang
hatinggalan ho pasingkolahon anakhonmu ia diulahon ho i”.
Ditariashon Ama Gelmok ma hata i
tu saluhut pangisi ni Tambun dohot tu marga boru. Dipatupa ma rapot di Tambun
Tonga-tongan, jala denggan do mardalan rapot i. Keputusanni rapot i, disuruma
laho paboahon barita i tu pangaranto pomparanni oppu ta.
Ditogihon Ama Gelmok ma donganna
Ama Friska Samosir laho manjalahi pangaranto tu Cinta Damai, Tanah Gambus dohot
Medan. Borhat ma nasida sian bona pasogit margogoihon Rp.10.000.- biaya
pardalanan dohot mangan nasida.
Di naborhat Ama Gelmok dohot Ama
Friska manopot pangaranto (tu Cinta Damai, Gambus dohot Medan), di pardalanan
pajumpa ma nasida dohot sahalak sian pomparanni oppu ta ima Ama Thomson Samosir
sian Banban di kapal Onan Runggu - Ajibata. Dibaritahon nasida ma sangkap ni
pardalannan nasida i na laho manjumpangi pangaranto pomparanni oppu ta Tumpak
Bolon. Las ma roha ni Ama Thomson laos digarari ma ongkos dohot mangannasida. Lasma
roha nasida dung sahat di Ajibata jala makkataima nasida nadua marsipadohan
ngasauton sakkaptaon. Tulus ma pardalanan nasida sahat tu Medan margogohon hepeng
Rp. 10.000.- i.
Dung sahat Ama Gelmok dohot Ama
Friska di Cinta Damai dohot tu Gombus, dipaboa nasida ma sangkap haroroni
nasida, laos ditolopi par Cinta Damai dohot par Gombus ma sangkap i jala lasma
rohani pomparanni oppu ta na adong di Cinta Damai dohot Gombus.
Dung i borhat ma muse Ama Gelmok
dohot Ama Friska tu Medan tu bagas ni Op. Diva Samosir di Mandala. Dipaboa
nasida masangkap haroroni nasida ima na naeng patupa partangiangan mangallang
horbo gok naung tung leleng dipaima-ima. Las ma rohani Op. Diva umbege barita
i, laos ditogihon ma nasida tu bagasni Dr. M. Samosir/br. Harahap. Dipasahat ma
hata i, ima sangkap ni pomparanni oppu ta tu Dr. M. Samosir. Las situtuma
rohani Dr. M. Samosir mambege sangkap dohot sude rencana ni pomparanni oppu ta
ima nanaeng mambahen partangiangan mangallang horbo gok.
Disukhun Op. Diva ma amang Dr. M.
Samosir, sadia ma na tarbahenni amang Dr. M Samosir manumpahi ulaon i. Gabe
dihatahon amang Dr.M. Samosir ma ½ Juta ma. Suang songon ima muse dipangido
nasida (Op. Diva, Ama Gelmok dohot Ama Friska) ma tu inang Br. Harahap sadia
natarbahensa.... dipatupa nasida ma muse ½ Juta. Las situtuma rohani nasida
umbege panumpahion ni amang Dr. M. Samosir dohot inang Br. Harahap. Pos situtu
ma roha nasida naingkon saut ulaon i ala 1 ½ Juta do argani sada horbo di tikki
i. “Molo na ½ Juta nari sian hami pe i” ninna Op. Diva Samosir, jala molo
hurang ba margugu pe parbona pasogit.
Mulakma Ama Gelmok dohot Ama
Friska tu bona pasogit. Dipatuma ma rapot di Tambun jala dipaboama parbueni
pardalanan nasida i tu parbona pasogit. Dipapungu parbona pasogitma gugu nasida
marhite boras/harbue.
Di ari na uli di bulan na denggan
dipatupa ma partangiangan mangallang horbo gok. Dung sidung mangallang horbo
gok silimahae, maretong ma panitia manghitung biaya nasuda hape adongdo sisa
hepengi gabe dibaen mai kas ni parsaadaanni ompputta. Dungi lam martamba tamba
ma hepengi ditanganni amang dokter M. Samosir. Dung godang hepengi dipatupa
amang dokter M. Samosir ma rapot gabe disangkapi rohani pomparanni oppu ta si
Bursok Bolon ma mambahe sada tanda ima Tugu, songon partanda ma i jala
parningotan di pomparan sundut rodi sundut. ---- dipadomuma muse tu pembentukan panitia....dohot udutna---
Dipatupa amang Dr. M. Samosir ma
sihumisikna (Rp......Juta-----mohon
dilengkapi) patujoloni pajongjong tugu i.
(.........ditorushon ma muse tu napajongjong tugu rodi sahat
tu ulang tahun terakhir jala sahat tu napajongjong tugu na mangolu.........)
-----------Sada nari pangidoan ni opputa, naeng pabanghiton
ma nian muse hasantionni oppu ta si Bursok Bolon------ naeng pajongjongon ma
nian monumen/patungna di tanona/mualna di Mual Sibuhal-buhal, dohot singa-singa
naung mago sian ruma parsattian na di Tambun Tonga-tonga. Porlu situtu do na
ikkon surathonon sejarah ni Mual Sibuhal-buhal sada mual Pauseang sian
Hula-Hula Sibarani, naboi dohonon sada keajaiban di hita, di na boi tubu sada
mual dung diusehon oppu ta si Bursok Bolon aek nabinoanna sian Laguboti tu tano
Sibutar, jala na tongtong haruar hurpotni eme sian mual i, na gabe sada tanda
nungga gotilon be juma pauseang ni borini Raja i di Laguboti. Sada halongangan
do i boi masa di Onan Runggu Samosir na marbariba tao dohot tano ni Laguboti.
Songon si ingoton “ ditikki rapot
dohot mameakkon batu ojahan ni tugui tetap do didok goarni opputta Sibursok Bolon. Hape dung jongjong tugu i
disuratton ma goarna Tumpak Bolon Samosir, manang sian dia pe goar i dang
binoto ise mangusulhoni. Ganup do pe hita na sorang jala na hea magodang di
Tambun / Samosir marningot; ia molo sada keluarga tubuan anak baowa naso jadi
dohonon si Bursok (si Ucok), alai ingkon si BARU do, alani goarni omputa
namamopar par Tambun do si BURSOK. Jala molo adong dakdanak na hona sahit
sibahut-bahuton manang magurbak hurumna, pintor didok natua-tua do, “Nunga
mamolus omputa si Bursok Bolon, bahen hamu tambar ni i hapur, ai i do tonani
Ompu i” Molo dibahen songon i pintor malum do tutu. Godang do pe hita na
marningot i.
Ditariashon : Ama Gelmok Samosir ( Op. Tiffanny
Samosir) Tambun
Ama Friska Samosir (Op. Lagoma Samosir) Tambun
Disurathon : Beslon Samosir, M.Pd (A. Lewi Samosir) Pematangsiantar
